Sunday, January 9, 2011

Cajiib: Ruug Caddaa 86-Jir Ah Oo Ka Soo Dagaalay Burma 1945-kii Kuna Nool Ceel-Afweyn Oo Kana Waramay Waayihii Dagaalkaasi

Ceel-Afweyn (BCT) – Oday Maxamed Caabi Maxamuud oo dadiisu tahay 86-jir ku nool deegaanka Ceel-Afweyn ee gobolka Sanaag ayaa sheegay inuu ka soo dagaal dalka Burma xiliyadii uu socday dagaalkii labaad ee aduunka (Second world war), Isla markaana waxa uu ka waramay tiradii Ciidamadii u dhashay Somaliland ee la dagaal galay Boqortooyadii Ingiriisku u qaatay inay ka soo dagaalamaan Dalgaalkii 2aad ee gaar ahaan Asia 1930-kii ilaa 1945-kii.

Maxamed Caabi Waxa uu sheegay in markii uu ka qayb galay dagaalkaasi u ka mid ahaa Dhalinyaro ka soo jeeda reer Somaliland oo Ingiriisku u qaaday dagaaladii uu ka waday Burma.


Oday Maxamed Caabi Ayaa waxa uu faahfaahin ka bixiyey waayihii iyo wacdarihii dagaalkaasi ay kala kulmeen iyo arimaha ku cusbaa dagaalkaas dagaalkaasi ay ku soo biiriyeen xeelado dagaal dhalinyaradoodii reer Somaliland ee wakhtigaasi ka dagaal galay qaarada Asia, isagoo tilmaamay inay xeeladahaasi ahaayeen qaar la yaab iyo anfariir ku beeray dhinacyadii ay dagaalka iskaga soo horjeedeen, isagoo xusay in dagaaladaasi ay ku soo kordhiyeen in xiliyada Habeenkii ay dagaal ku qaadaan dhufaysyada cadowga (Dagaalka Mir, ee habeenkii), kaas oo aanay isticmaali jirin ka hor, isla markaana halka uu gabalku ugu dhaco dagaalka ay ku kala hoyan jireen.


Maxamed Waxa uu sheegay in Jamhuuriyadii Somaliland British Protectorate ay dagaalkaasi uga qayb galeen laba Batalyan oo midkiiba yahay 1500 Askari oo la kala odhan jiray 71Kr iyo 72Kr, taas oo uu sheegay in dagaalkaasi oo muddo dheer soconayey, isla markaana la isku mari waayey xeeladihii dagaal oo uu xusay in ciidamadii ka socday Somaliland ay hor seedeen xeelad cusub oo guulo u hor seeday Ciidamadoodii uu hogaaminayey Ingiriisku, Xeeladaas oo ahayd dagaalka Habeenkii ee loo yaqaano Mirta.


Oday Maxamed Caabi waxa uu sidaasi u sheegay mar uu u waramayey Wariye Cismaan Cumar Faarax oo ka tirsan Ceerigaabo.com, ayaa sidoo kale ka waramay tiradii kaga dhimatay dagaalka Burma ciidamadii ka socday Somaliland, oo uu sheegay inay kaga geeriyoodeen 50 askari.


Oday Caabi waxa uu intaa ku daray in Bishii May 15/1945  amar lagu siiyey in  300 askari in laga shaqalaysiiyey Somaliland oo markaas xukumaayey Ingiriisku, isla markaana intii soo hadhay waxa fasax loo siiyey inay ka degi karaan oo ku noolaan karaan Dal kasta oo ka mid ah dalalkii ka tirsanaa xulufadii Ingiriisku hor kacayey, inkast a oo uu sheegay in intoodoodii badnayd ay ku soo noqdeen Dalkoodii hooyo oo uu u hayey Boholyow iyo xiiso.


Ugu dambayntii Oday Maxamed Caabi waxa uu ka codsaday dawladda Ingiriiska iyo xukuumadda Somaliland-ba in xuquuqdoodii la doono ragii uu ka midka ahaa mid geeriyooday iyo mid noolba.

Madaxaweynaha Somaliland Oo La Filayo In Uu Safar Ku Tago Gobolada Bariga + Nuxurka Safarkaasi

Hargeysa (BCT) Madaxweynaha Somaliland Md.Axmed Maxamed Siilaanyo la filayaa inuu horaanta todbaadkan  safar shaqo ugu kiciimidoono Gobolada Saaxil iyo Togdheer.Wararka ayaa waxa ay kale oo ay sheegayaan in uu madaxweynuhu safarkiisan uu ku tagayo goboladaasi uu  ku hor maridoono Magaalo madaxda Gobolka saaxil ee Berbera, halkaasina uu kulan kula yeealn doono masuuliinta iyo cuqaasha gobolkaasi, inkastoo aanu jirin  ilaayo hada xog rasmi ah oo arinta safarkan  la xidhiidha oo ka  soo baxaday Qasriga  madaxtooyada Somaliland.

 Safarkan   Madaxweynaha oo ah kii ugu horeeyey ee uu ku gaalaabixiyo gobolada Somaliland tan iyo intii loo dhaariyey xilka madaxtinomo, ayaa  si weyn looga dareemayaa magaalada Berbera halkaasi oo ay ka socdaan daldaalo loogu jiro soo dhaweyntiisa,  iyo abaabul ku saabsan  sidii cuqaashada Gobolkaasi ay kulan garnaqsi ah ula yeelan lahaayeen Madaxweyne Siilaanyo.

Waxa la filayaa in Madaxweyne Axmed Siilaanyo  mudada uu ku sugankyahay magaalada Berbera uu kormeer ku tagidoono  dakada caalamiga ah ee Magaaladaasi, kalkaasi oo uu indhawaalena ay ka socdeen dayactiro balaadhan oo xaga dhismaha ah.


Wararka ka imanaya Magaalda Burco ayaa  waxaay sheegayaan  inuu hada ku sugan yahay Chief of Cabinetka Madaxtooyadda Somaliland Xirsi Cali X Xasan , waxaanu halkaas ka wadaa diyaar garow balaadhan oo uu ugu sii gogl xaadhayo Waftiga Madaxweynaha iyadoo laga dareemayo magaaladaasi dhaqdhaqaaq xoogan oo uu wado.

Saturday, January 8, 2011

CAAFIMAADKA BINU-AADAMKA, GAAR AHAAN RAGA OO AAD U SII XUMAANAAYA, MAXAY TAHAY SABABTU?


 

Melbourne, Australia: (Burcotoday) Waxa run ahaantii caafimaadku yahay waxyaabaha qofka binu-aadamku ku faani karo, Waxa hadaba aduunyadan aynu ku nool nahay ka jira dad la itaal daran caafimaad daro, oo hadii ay maanta heli karaana ay wax kasta oo ay awoodaan ay siisan kari lahaayeen. Hadaba waxa jira ninka magaciisa la yidhaahdo Manual Uribe Garza, oo dhalasho ahaan ka soo jeeda dalka Mexico in uu qaaday koobka qofka aduunka ugu buuran oo runtii aan ahayn wax lagu faano, hadaba arintaas oo taagan ayaa waxa hadana dhacday in isla ninkani uu aroostay gabadh ay in mudo ah is jeclaayeen oo magaceeda la yidhaahdo Claudia Solis, oo iyaduna isla wadankaas Mexico ka soo jeeda. Walow aan qabo in aan loo baahnayn in aynu ku sii dheerano ama aynu is waydiino nolosha ay wadaagi doonan lamaanahan amaba aanay haboonayn in laysku wareeriyo ama lays waydiiyo oo la yidhaahdo, Waa maxay ninka caynkan ah ee hadana dumarka islaameed afka iskula galay. Waxaan hadaba filayaa waatii uu hore wariyaha caanka ah ee Ahmed Hassan cawke ugu soo qaatay barnaamijkiisa ka baxa Universal TV ee yidhi isagoo arintan mid la mid ah ka hadlaaya isla markaasna ku soo hal qabsaday odhaahdii ahayd "Nin tuur lihi tab uu u seexdo waa yaqaan".

Waxa hadaba jirta in run ahaantii caafimaadku yahay waxa keliya ee binu aadamku ku faano,
sababtoo ah caafimaad la´aan waxa hubaal ah in aanay nololi jiri karin. Bal hadaba aynu maanta qoraalkeenan aynu ku soo qaadano maqaalkan aynu ku lafo gurayno caafimaadka binu-aadamka. Waxa hadaba hubaal ah in maanta Somali ukala qaxday afarta beenu jaho, iyagoo nolol raadinaaya. Hadaba waxa jirtay in beri samaadkii ay caadiyan dhaqan iska ahayd in qofkii miisan culusi saaran yahay ama aad u buuran in loo yaqaanay in uu yahay qof ilaahay wax siiyey isla markaasna gaajo iyo baahi buur dheer ka fuulay. Dhanka kalana qofka dhuuban ama caatada ahna waxa aynu ka haysanay fikrad ah in uu yahay qof gaajo la luudaaya oo dabcan aan haysan wax u cuno, amaba mararka qaar lagu xanto in uu xanuun qabo iyo waxyaalo kale oo la mid ah. Waxaan hadaba anigu aan qabaa waxa eedan oo dhan iska leh maaha dadka ee waa baahida xad dhaafka ah ee xeryaha melateriga ka samaysatay guud ahaan qaarada Afrika.

Hadaba siday wax ka qoreen dhakhaatiirta dalka maraykanku waxay dhawaan sheegeen in tobankii sano ee ugu danbeeyey ay xad dhaaf noqotay miisanka dadka oo sii koraaya gaar ahaan xaga raga, taas oo ay ilaa hadana baadhitaan ku wadaan, Hadaba warbixin dhawaan lagu qoray joornaalka loo yaqaano "The Journal of the American medical Association" (JAMA) ee ka soo baxa dalkaasi maraykanka ayaa sheegay in dhibaatadani ugu wacan tahay in qofku uu gaadho heer isagoon aan baahi ama gaajo midna aan qabin in hadana jidhkiisu rabo oo uu ku qasbo in uu wax kale cuno, taas oo keliftay in ay cunaan macmacaan ciidaas ka badan, sida Chocolate-ka, Ice cream-ka, Junk Foods, sida McDonalds, KFC iyo Hungry Jacks, iyo dabcan wixii kale ee macmacaan ama cunto fud fudud ah ee la hal maala. Taasina ay dhaliso in qofka calooshu sii fido oo uu yeesho miisan aan la xadidi karin, taas oo sabab u noqon karta in uu xanuuno badan keeno, sida wadna xanuunka, iyo macaanka iyo xanuuno kale oo soo raaca. Hadaba sida uu joornaalku qoray dadkan la il daran buurnaanta waxay badankoodu ku nool yihiin qaarada yurub iyo Amerika.

Waxa hadaba jirta in maanta fikirkaas ah in lays naaxiyo aanu ka jirin aduunka intiisa kale oo qofkii karayaa iskaga cararo, laakin uu weli Afrika ku sii hadhay, Hadaba maanta aduunka intiisa kale waxa runtii ka jirta in laga faano ama laga cararo oo aad layskaga ilaaliyo in la naaxo, iyadoo aad looga cabsi qabo in uu caafimaad daro keeno, taasna in badan la arkay.  Hadaba waxa jirta in maanta meelo badan oo Afrika ka mid ah aad arkayso dad badan oo cunaaya raashin aan isku dheeli tirnayn, ama aad wax u cunaaya si ay u naaxaan, hadaba waxaad maanta wadankeena ku arkaysaa dad badan oo ku qadaynaaya raashin runtii aad u dufan badan isla markaasna aan samaynayn wax jimicsi ah (Exercise) oo uu iskaga saaro dufanka intaas leeg ee jidhkiisa ku maqan. Hadaba waxa ilaahay lagu mahadiyaa in maanta dadka wadankii joogaa ay yihiin dad wax kasta oo ay cunaan iskaga jira jimicsi rabaani ah oo intaas lugaynaaya, markaas waxaaba la odhan karaa iyagaaba ilaa hada u sii baahan dufan dheeraad ah, si jidhkoodu u helo aaladaha kala duwan ee qofka jdhkiisu u baahan yahay. Waxa dadka wadankii joogaa ay ku odhanayaan waxaanu nahay "caato caafimaad qabta"
 

Hadaba meesha dhibtu taala waa qurbaha oo runtii cunista raashinka dufanka leh aanu ka maqnayn isla markaasna aanad arkayn wax lugaynaaya ama jimcisi samaynaaya si uu iskaga ilaaliyo khatarta uu keeni karo raashinka uu cunay iyo baaxada dufanka uu wato ee jidhkiisa ku maqan, waa marka laga hadlaayo gaar ahaan Soomaalida ku dhaqan qurbaha, kaas oo dhliyey in cuduro badan laga qaado oo uu ugu horeeyo xanuunka loo yaqaano macaanka. Waxa qurbaha iska caadi noqday in la cuno wax kasta oo macaan leh, wax kasta oo dufan leh isla markaasna fadhi siyaado ah lagu sii darsaday, oo aad mararka qaar arkayso qof dukaanka deriskiisa ah, hadii dani ka soo gasho ilaa uu gaadhi u qaato aanu u lugayn karin. Waxa kale oo aad arkaysaa dad badan oo wakhti badan ku bixinaaya cunista jaadka taas oo ay ka dhigteen maalin walba, waxa kale oo jirta oo maanta aad yurub iyo Amerika aad ku arkaysaa dad badan oo gawaadhi wata ama tagsiilayaal ah oo gaadhigaas saaran mudo ka badan toban saacadood maalin kastaba.  Waxa hadaba yaab leh oo maanta yurub iyo Amerika ka furan intaas oo meelood oo jimicsi lagu sameeyo, laakiin nasiib daro arki maysid maanta cid tagta marka laga hadlaayo gaar ahaan dadka Soomaaliyeed ee qurbaha ku nool, rag iyo dumar isku soo wada duub. waxa xusid mudan in dad yar oo Soomaali ah oo fara ku tiris ah oo degan yurub iyo Amerika ay fursadahan jimicsiga ka faa"iidaystaan si ay wax uga qabtaan caafimaadkooda iyagoo iskaga baqaaya in ay aakhirataanka ku danbeeyaan sida sawirada kor ku xusan.

Hadaba siday doontaba ha ahaate, waxa filimo badan uu maraykanku ka sameeyey dhibaatada haysata dadka buur buuran waxaana ka mid ahaa filimkii caanka ahaa ee uu jilaayey aktarka caanka ah ee Eddy Murphy ee la odhan jiray "The Nutty Professor". walow Filimkani uu ahaa mid ay aad uga cadhoodeen isla markaasna ay ka dacwoodeen dadka buurbuuran ee u dhashay dalka maraykanka. Waxa kale oo xusid mudan in uu dalka maraykanka uu ka jiro urur u dooda xuquuqda dadka buur buuran ee maraykanka ah oo loo yaqaano "The American Fat People´s Association of America". (AFPAA)

Waxa hadaba  shabakada wararka ee caalamiga ah ee Hadhwanaagnews.com ay hore idiinku soo diyaarisay waxyaalo badan oo runtii aad idiin cajab geliyey, Bal hadaba waxaad maantana aad hoos ka daawataa Video ka war bixinaaya dhibaatada haysata dadka buur buuran ee aduunka ku nool iyo mid dadkaas buurbuuran ka mid ah oo aroos galay.
 
http://www.youtube.com/watch?v=pU_Rhw9BE44

http://health.ninemsn.com.au/menshealth/8192200/the-real-reasons-men-are-getting-fatter
 

Xukuumadda Waxa ka Go’an in Mudnaanta 1aad la Siiyo Nabadda oo ah Hantida ugu Qaalisan ee aynu haysa

PDF Print E-mail
Wasiirka arrimaha gudaha oo sheegay in beesha caalamku indhaha ku hayso, isla markaana qiimaynayso nabadda Somaliland



Hargeysa (TogdhNews)-Wasiirka arrimaha gudaha Somaliland, ayaa ku dhawaaqay in xukuumadda madaxweyne Siilaanyo hoggaamiyo ay ka go’an tahay in mudnaanta koowaad la siiyo ilaalinta nabadda oo uu ku sifeeyey hantida qudha ee dalku haysto.
Wasiirka arrimaha gudaha oo hadal ka jeediyey kulan odayaasha isku haya deegaanka Ceelberdaale shalay heshiis ku kala saxeexdeen, waxa uu sheegay in beesha caalamku indhogaar ah ku eegayso Somaliland, isla markaana la qiimaynayo nabadda deegaanka ka jirta.
“Nabaddu shakhsi kasta waa u dan, dalkeena Somaliland maanta indho gaar ah ayaa lagu eegayaa oo doorasho xor iyo xallaal ku dhammaatay ayeynu ka soo baxnay, maamul si nabad ah look ala wareejiyey ayeynu soo marnay, markaa caalamku indho gaar ah ayuu inagu eegayaa nabadeenana wuu qiimaynayaa, xukuumadda oo uu hoggaaminayo madaxweynuhu waxa ka go’an in nabadda oo ah hantida ugu qaalisan ee aynu haysanayo la siiyo mudnaanta koowaad, maadaama aan wax kale la’aanteed la qaban Karin,”  ayuu yidhi wasiirka arrimaha guduhu.
Hadalkan ka soo yeedhay wasiirka arrimaha gudaha, ayaa u muuqda in xukuumadda madaxweyne Siilaanyo muhiimad gaar ah siinayso ilaalinta iyo adkaynta nabadda ka jirta Somaliland, maadaama xasiloonida iyo degannaanshaha ay ammaan iyo sumcad badan Somaliland kaga kastabay beesha caalamka, isla markaana ay jiraan kooxo cadaw ah oo doonaya inay khalkhaliyaan degannaansha dalka iyo mandaqada Geeska Afrika.

SAWIRKA MAANTA, Doox & Dhirta Ka Baxday oo Aad u Qurux Badan Daawo oo Ku Diirso

Sawirka Maanta Ee Shabakada Caalamiga Ah Ee Burcotoday Waa Doox Aad u Qurux Badan oo Ku Yaalla Dalkeena Somaliland, Dooxan & Dhirta Ka Baxday oo Runtii Aad u Qurux Badan Indhahana Soo Jiidanaya, Idinka Ayaa la Idinka Rabbaa Inaad garataan Halka uu Ku Yaallo, DAAWADA QURUXDA DALKEENA

Madaxweynaha Somaliland Oo Shacabka Ugu Baaqay Ka Qayb-galka Salaada Roob-doonta Ee Salaasada Soo Socota La Tukan Doono

Hargeysa (BURCOTODAY)- Madaxweyanaha JSL Mudane: Axmed Maxamed Maxamuud (Siilaanyo) ayaa Salaadii Jimcaha ka dib waxa uu ku dhawaaqay in Maalinta Salaasada ah ee bishu tahay 11/01/2011 Dalka oo dhan laga tukandoono Salaad Roob-doon ah Saacadu markay Tahay 08:00 Am Subaxnimo.

madaxweynuhu waxa uu Hadalkiisa ku bilaabaysidan: “ Marka Hore waxa aan Dadwaynaha Reer Somaliland meel ay joogaanba waxan u soo Gudbinayaa Salaanta Islaamka

Maanta waxa aan halkanka ka soo Jeedinayaa Madaama aynu nahay Dad Muslim ah Dalkana ay ka jirto Biyo la’aan Baahsani Gaar ahaan Gobolada Sool, Sanaag iyo Togdheer meelo ka mida.

 

Maaha Marka la leeyahay Biyo La’aan ayaa taagan in ay jirto Abaari Laakiin waxa aynu ILLAAHAY ka baryeynaa in uu Biyo La’aantaa inaga Kor-qaado.

 

Dadka waxa aan u ugu Baqayaa Gaar ahaan Hay’adaha Madaxa Banaan Hadaanu Dawlad ahaan ay tahay in ay talaabo ka qaadi doonto Hawshaa oo ay Tabaruc ka Gelayso oo ay Dadaal Dheeraada ka gaysan donaan Biyana ay gaadhsiso Goboladaa Biyo La’aantu ka jirto, waxa kale oo aanu Amar siinay Hay’adaha Deeq Bixiyayaasha ah ee Halkaasi Jooga inay sida ugu Dhakhsaha Badan Gacan uga gaystaan oo ay Biyo ula Gaadhaan Dadka Biya la’aantu hayso, Waxa kale oo aanu Jecelnahay inay Dadka Bayac-mushtarka ah ee Reer Somaliland ay Dadkaa Gurmad Biyood la gaadhaan oo ay Gacan Muuqata ka gaystaan.

 

Intaa ka Dib Madaxweynuhu waxa uu Bulshada Ugu Bushaareeyey Arrintii ka Taagnayad Galbeedka Gaar ahaan Ceel-bardaale in la soo Af-jaray oo Nabad gelyo wanaagsan oo aad iyo aad looga hawl galay oo ay Shaqo Fiicani ka Dhacday Dadkii Walaalaha ahaa ee Halkaa wada Deganaa ee Shaqaaqada Mudada Dheer soo jiitamaysay ay Dhextaalay Dhibaatada iyo Is Af-garan waagu ka taagnaa in meel wanaagsan oo aad iyo aad u fiican laga gaadhay taasi oo ah mid ALLE loogu Mahadiyo mida kale ee aan Mahad naqa balaadhan uga Celinayo Labada beelood ee halkaa mudada badan isku hortaagnaa iyo intii ka Hawlgashay ee ka qayb gashay Shaqadaa ee isku day-day ama Ficil badan ka gaysatay wakhti badana ku bixiyey kuna Dhaliyey in ay Dadkaasi isu soo jiidaan isuna keenaan oo ay hawshaa wax ka qabtaan, Hawshaasina meel aad iyo aad u Wanaagsan ayey maraysaa markaa mahadnaq balaadhanna Dadkaa waan u soo jeedinayaa waxa aynu jecel nahay in aynu soo wada dhawayno oo aynu kuligeen hawsha meeshii ay inaga qabsato ee hawlahaasi inooga baahdaan aynu ka taageerno gacan-na ka gaysano wixii taabanaya Nabad gelyada Dalkeena Waxa aad ogtihiin in maanta meelo badan Cadaawadi inoo taalo oo Degmooyin badan Cadaw lagu yahay Jiritaankeena iyo Midnimadeena iyo Wada jirkeena in aynu noqono kuwa u gurmanaya inaga lafteenu oo aynu noqono kuwa Gacanta is qabsanaya.

 

Madaama aynu nahay Umad Muslin ah oo marka ay Biyo la’aan sidan oo kale ahi Dhacdo ee ay adkaato Waxa Rasuulkii Suubanaa SALALAAHU CALEEHI WASALAM (NNKH) uu tukan jiray Sallaada Roob-doonta Isaga oo ALLE SUBXAANA WA-TACAALA U BANDHIGAAYA Baahida ay Umadani u baahan tahay Naxariistiisa Sidaa Awgeed inaga oo Raacayna Sunaha Rasuulka Salalaahu Caleehi Wasalam waxa aan farayaa Dhamaan Umada Reer Somaliland inay ALLE ka Cabsadaan oo ay u Toobad kenaan oo ay isna Saamaxaan kana Qayb galaan Salaada Roob-doonta ah ee ka dhici Doonta Dhamaan gobolada iyo Degmooyinka Jamhuuriyada Somaliland Maalinta Salaasada Bisha Safar na ay tahay 7/02/1432 ee ku began 11/01/2011 Saacadu markay Tahay Siddeeda Subaxnimo.

Chief Caaqilka Guud Ee Beelaha Galbeedka Burco Oo Si Heersare Ah Loogu Soo Dhaweeyey Magaalada Burco

MAXAKAMADA XUQUUQUL INSAANKA MIDOWGA YURUB OO DIIDAY IN QAXOONTI SOOMAALIYEED OO KU SUGAN WADANKA HOLLAND DIB LOOGU CELIYO WADANKOODII.

Strasbourg:(BCT) Maxakamada Xuquuqul Insaanka ee Midowga Yurub ayaa ka hortimi go’aan dawlada Holland ku rabtay in qaxoonti Soomaaliyeed dib ugu celiso dalkoodii kadib markii ay ku guuldaraysteen codsigoodii magangelyo. Maxakamada ayaa sheegtay in xaalada dalka Soomaaliya ay meel halis ah marayso isla markaasina hadii Soomaalida magangelyo doonka ah dib loogu celiyo dalka Soomaaliya ay noloshoodu halis geli karto.


Dhawaan ayay ahayd markii ay xukuumada cusub ee Netherland sheegtay in dadka ka yimaada magaalada Muqdisho oo qudha ay u arki karto dad ka yimi goob colaadeed balse deegaanada Badhtamaha iyo Koonfurta Soomaaliya oo hore xukuumada Holland utaqaanay goobo colaadeed ay hada u arkayso goobo nabdoon. Geesta kale Gudoomiyaha hay’ada caawisa dadka qaxoontiga ee magaceeda loo soo gaabiyo VWN Mr  Dorine Manson ayaa sheegay in uu aad u rajaynayo in dawlada Netherland ay tixgelin doonto go’aanka maxakamada ku dhawaaqday.

 

Wednesday, January 5, 2011

"Madax Banaanida Koonfurta Suudaan Waxay Si Dhab Ah Ugu Gogol Xaadhaysa Aqoonsi Buuxda Oo Si Hubaal Ah Gacanta Ugu Gallay Somaliland:"Wergeyska The Daily Star

London Beirut (Burcotoday.blogspot.com)-- Wergeyska ugu weyn wergeysyada ku soo baxa luuqadda afka ingiriisiga ee dalka Lebnon ayaa maanta Boggiisa hore wuxuu ku daabacay Qoraal uu ugu magac darray "Ma Madax Bannaani Mise Dagaal Ayaa Laga Sugaya Suudaan?, Adduunyada Oo Neef Kulul Ku Taagantahay", Wergeysku wuxuu qormadiisa oo aad u xiiso badnayd ku bilaabay 1990-maadkii Adduunyadu waxay Indhaha la heshay Xasuuqii Ruwaanda iyo Dagaalkii Biyo Xidhaneeda waaweyn ee Jamhuuriyadda Congo kuwaasi oo tiro ahaan galaaftay nolosha 5 Malyuun oo qof oo Afrikaan ah taasi oo noqotay dhimashadii ugu badnayd ee koonkani ka dhacda tan iyo dagaalkii labaad ee dunida.


Waxay ahayd mid Dunidu dayacday si badheedh ahna uga aamustay balse su´aasha taagani ma waxay tahay Aamusnaantaasi ay dunidu afka gacanta uga saaratay indhahana uga jeedisay Afrika tusaale ma u noqon doonta dagaal Sokeeye oo ka qarxa markale dalka Suudaan?

Heshiiskii Naivasha ee Dawladda Sudan iyo kooxdii xornimo u dirirka ahayd ee koonfurta dalka Suudaan SPLM ay ku gaadheen dalka Kenya sannadkii 2005-tii ayaa wuxuu baajiyey collaad ka holcaysay dalka ugu weyn Qaaradda Afrika ee Suudaan ku 20 neeyo sannadood waxaanay taasi u dirtay farriin cad dunida inteeda kale inay Afrika gaadhi karto heshiis iyadoon u baahnayn gacan shisheeye isla markaana ay Afrika ku bedeli karto dagaal Midnimo, taasi waxay sidoo kale ay dhabbada u jeexday hilaw, kalgacal iyo riyo aad u weyn oo dadka Koonfurta Suudaan ay 50-kii sannadood ee ugu danbeeyeyba ay u qabeen helitaanka dal ay u madax bannaan yahiin, Heshiiskii loogu yeedhay Heshiiska Isfahamka iyo Nabadda (Comprehensive Peace Agreement) ee labada dal ku gaadheen dalka Kenya ayaa wuxuu dhallay in loo ogolaado  dadka ku nool koonfurta Suudaan inay aayahooda ka taliyaan oo madax banaani helaan iyo  inay midnimadii ay waqooyiga kula jireen ku qanacsanyahiin 

Aftida dadka koonfurta Sudan ay u dareerayaan 9-ka January waa mid sida daruurta u cad halka codku marayo isla markaana ay rajadu siiba muujinayso dalkii labaad ee afrikaan ah ee xornimadiisa qaata tan iyo wixii ka danbeeyey gumaystayaashii xornimada u celiyey dalalka Afrika inuu ka dhex dilaacayo Sudan, waxaa Aftidaasi barbar socon doona mid kale oo dadka ku nool Gobolka Saliidda ku qaniga ah ee Abbey ay dhiiban doonaan oo ah inay ka mid noqonayaan koonfurta Suudaan iyo inay ku hadhi doonaan Waqooyiga dalka Sudan.

Wergeyska The Daily Star isagoo qormadiisa sii wata wuxuu sharaxaad dheer ka bixiyey kala duwanaanshaha dhinaca diinta iyo fekerka siyaasiga ah ee u dhexeeya labada Sudan in xalku noqdo sidii labada dhinac waa waqooyiga Sudan oo dadka ku nool yahiin Muslimiin asal ahaan lagu tiriyo inay ka soo jeedaan qoomiyadaha Carabta iyo Koonfurta oo aaminsan iinta Kiristaanka asal ahaana Afrikaan ah ay midnimadoodu noqotay madhalays, Wergeysku wuxuu sidoo kale ka hadlay in dareenka xamaasadaysan ee labada dhinac u dhexeeya ay kala jiidanayaan dalalka Maraykanka iyo Shiinaha oo mid weliba u hunguri taagaayo sidii uu uga manaafacadsan lahaa kheyraadka saliidda jamhuuriyadda Cusub ee koonfurta Sudan.

Wergeyska The Daily Star wuxuu farta ku fiiqay in xornimada Koonfurta Suudaan aanay keliya gundhig u ahayn kala fogaanshaha mabda´a diimeed iyo midka siyaasadeed ee labada Suudaan balse sidoo kale qayb ay ka tahay collaadda siyaasadeed ee gamuurtay ee u dhexaysa dalalka wadaagga Webiga Nile, sida Masar, Ethiopia iyo Yuganda.

Wergeysku isagoo qormadiisa sii wata wuxuu diiradda saaray muhiimada ugu weyn ee ay Xornimada Jamhuuriyadda Koonfurta Suudaan u leedahay Qaaradda Afrika inteeda kale isagoo arrintaasi Wergeysku sii faah faahinaya wuxuu yidhi Xornimada Koonfurta Suudaan waxay dalalka reer galbeedka ku sandulayn doonta isbedel siyaasadeed oo gebi ahaanba saamayn ku yeesha qaaradda Afrika Gaar ahaana dalalka aaminsan mabda´a kala go´a ama kala madax banaanshiyaha sida Soomaaliya iyo Nigeria  dalalkaasi oo la daala dhacaya collaado ay dawo u noqon karto in la kala madax banaaneeyo, Wergeysku isagoo qormadiisa sii wada wuxuu xaqiijiyey in Madax Banaanida Koonfurta Suudaan ay dammaanad qaad cad u tahay xornimo iyo Madax banaani ay hesho Jamhuuriyadda Somaliland oo ah gobol horumar iyo xasilooni ku naaloonaayay 20-kii sannadood ee ugu danbeeyey, Madax banaanidiisiina kala soo noqday 18 May 1991-kii dalka Soomaaliya.

Wergeysku Wuxuu Qormadiisani oo aad u xiiso badnayd ku soo gunaanaday Adduunyada waxaa ku taagan neef kulul, Koonfuurta Suudan waxay u jeexi doonta Afrika inteeda kale waa iyo waayo cusub oo u barya oo laga yaabo inay faraj u noqoto afrika oo boqolaal sannadood hurdo ku jirtay

Qormadani Waxaa Daabacay Wergeyska The Daily Star ee Ka Soo Baxa Caasimadda dalka Lebnon Ee Beirut maanta Iyadoo afka ingiriisiga ku qoran halkani ka akhriso

http://www.dailystar.com.lb/article.asp?edition_id=1&categ_id=5&article_id=123233#axzz1A7Hn3rZk

Wiil uu dhalay boqorkii hore ee Iran (Boqor Shah) oo is dilay.




(Burcotoday)  Arbaca, Jan.5.2011  . Waxaa  maalinimadii shalay  is daldalay wiil  uu dhalay boqorkii hore  ee Iran boqor SHah,isagoo isku dilay gurigiisa oo ku yaalay magaalada Boston ee gobolka Massachusetts ee dalka Maryakanka.
  Nikan oo lagu magaaci jiray Alireza Pahlavi oo 44 jir ahaa ayaa waxaa dhalay Mohamed Reza Pahlavi oo lo yaqaanay  Boqor  Shah, kaasoo  uu xukunka ka tuuray wadaadkii la odhan  jiray Ayatulaha KHumaeyni sanadkii 1979,isagoo sanadkii ku xigayna isagoo mastaafuris u jooga dalka Masar  caasimadiisa Qaahira ku geeryooday.

     Boqor Shaah  ayaa xaaskiisii iyo caruutiisaba degeen dalka Maryakanaka, halkkasoo ilaa hadda ay ku nool yihiin.

   Maaha markii  ugu horaysay ee qoyska  boqor SHaah ay  is dilaan, hasa yeeshee sanadkii 2001 ayaa iyaduna waxaa is deldeshay gabadh  uu dhalay oo la odhan jiray Layla Pahlavi.
  
      Ilaa  hadda  lama  garanayo sababta dhabta ah ee  keentay in labadan walaaha ahi is dilaan

Madaxtooyadda Somaliland oo Amartay inay Hubka ay haystaan soo xareeyaan Ilaalada Madaxweynihii iyo ku-xigeenkiisii hore

Madaxtooyadda Somaliland oo Amartay inay Hubka ay haystaan soo xareeyaan Ilaalada Madaxweynihii iyo ku-xigeenkiisii hore Waxa ay ka mid yihiin Masuuliyiinta uu Dastuurku siiyey maamuuska gaarka ah
Taliyaha Ciidanka ilaalada Madaxtooyadda Somaliland Faysal Kaamil Ciise ayaa ku Amray Ilaalada Madaxweynihii hore iyo ku-xigeenkiisii Daahir Rayaale Kaahin iyo Axmed Yuusuf Yaasiin inay soo xareeyaan Baastoolada ay haystaan ee la siiyay wakhtigii Xukuumaddii hore ay talada haysay.
Ilaalada uu Taliyuhu Amray inay soo xareeyaan Baastooladahaasi oo dhan 11 Askari oo ka tirsan Ciidanka ilaalada Madaxtooyadda ayaa imika ka hawlgala Guryaha Masuuliyiintaasi xilka ku wareejisay Madaxweynaha iyo Madaxweyne ku-xigeenka hada talada haya, waxaanay sida ay noo sheegeen qaar ka mid ah Askartaasi ay ku joogaan shaqada ay hayaan heshiis ay wada gaadheen masuuliyiinta xilka haysa iyo kuwa wareejiyay
Hase yeeshee waxa ay Ilo xogogaal ahi sheegeen in ay ilaalada labada masuul ee talada Dalka hore u hayn jiray ay Taliyaha Madaxtooyadda ee ka soo dalbaday inay Hubkaas soo xareeyaan u sheegeen inaanay soo xaraynayn ilaa iyo inta ay Ogolaansho ka helayaan cida la soo raaciyay ee ay u shaqeeyaan.
Balse Taliyaha ayaa la sheegay inuu ka diiday Codsigoodaas, waxaanu shalay u keenay Amar kale oo uu ku Amrayo inay maanta Toddobadda Subaxnimo soo xareeyaan Haddii kale uu talaabo ka qaadi doono, isagoo ugu hanjabay inuu Ruqsayn doono shaqada ay hayaana ciidan kale keeni doono.
Ilaa hada arrintan kama uu hadal Madaxweyne ku-xigeenkii hore oo imika Dalka ku sugan isla markaana Madaxtooyadu wax wargalin ah isaga may siin ee waxay toos ula xidhiidheen Askarta u shaqaysa hase yeeshee Taliyaha Ciidanka Illaalada Madaxtooyadda oo ay waaheen wax ka weydiisay Arrinkaasi ayaa u sheegay inuu isagu Amarkaas bixiyay oo uu kaga qaadayo Baastooladahaasi, waxaanu sheegay inay ka ururinayaan wixii aan Saraakiil ahayn ee Ciidanka ka tirsan.
Macadam sababta ay xukuumadu talaabadan u qaaday iyadoo masuuliyiintaasi ka mid yihiin dadka uu dastuurka Somaliland siiyey maamuuska gaarka ah.

Waxa kale oo aad ogtihiin in gudiyadii gobolada bariga inay Widh-Widh iyo Laascaanoodba gaadheen oo ay shirar qabsoomeen, ilaa haddana gacmaha ayay kula jiraan.”

Afhayeenkii xisbiga Talada dalka haya ee KULMIYE Mujaahid Maxamed Kaahin Axmed, ayaa sheegay in xukuumada Madaxwayne Axmed Maxamed Siilaanyo aanay ku habsaamayn qodqodka masuuliyiintii hore ee xisbiga UDUB balse ay dadaal u galayso sidii sare loogu qaadi lahaa dhaqaalaha iyo amniga guud ee dalka. Md Maxamed Kaahin Axmed, waxa uu tilmaamay in xukuumada cusub ee Somalilad wax badan ka qabatay sidii loo kobcin lahaa dhaqaalaha isla-markaana mushaharooyinka shaqaalaha dawlada la bixiyo aakhirka bil walba, taasina ay tahay dadaal la sameeyay.
Maxamed Kaahin oo wareysi kooban siiyay Geeska Afrika, ayaa sidoo kale wax ka tilmaamay waxqabadka hanti-dhowrka guud qaranka, waxaanu sheegay in hanti-dhowrku uu imikaba baadhayo maamulka ka soo jeeda xisbiga KULMIYE “Anagu anaga ayaaba is qodqodeyna oo waadiga arkay xisbiga KULMIYE sida uu u wada hadlayo hanti-dhowrkuna cida uu baadhayo waa maamulka xisbiga KULMIYE gacanta ku hayo, markaa inta aan cidba na qodqodin anaga ayaa is qodqodayna.” Ayuu yidhi isagoo ka jawaabay sida uu u arko baadhista hantidhawrka ee masuuliyiintii xukuumadii hore, “Xisbiga KULMIYE waajibka ugu horeeya ee xukuumadiisa saarani maaha inay dawladii hore qodqodo, markaa waaanu qabnaa in hanti-dhowrku hawl-wayn qabtay, laakiin siyaasada xisbigu maaha inuu xisbigu ku habsaamo oo la yidhaahdo xisbigii hore iyo xukuumadii maxay qodqod lahaayeen, maxay dhaliil lahaayeen iyo hebel waa sidee iyo hebelka kale ee waa sidee, taasina maamuuskeeda iyo meesheeda ayay leedahay.”
Md Maxamed Kaahin waxa uu sheegay in dawlada Somaliland dhaqdhaaqyo siyaasadeed oo xal ah ka samaysay gobolada bariga “Waxa kale oo aad ogtihiin in gudiyadii gobolada bariga inay Widh-Widh iyo Laascaanoodba gaadheen oo ay shirar qabsoomeen, ilaa haddana gacmaha ayay kula jiraan.” Ayuu yidhi waxaanu intaas sii raaciyay isaga oo sharaxaya caqabadaha dawada Afrika fadhiidka ka dhiga iyo saamaynta uu ku leeyahay musuqmaasuqa “Waa dhab oo xisbigu barnaamij ayuu lahaa, dawlad wanaagana waxa aasaas u ah maamulka, waxa aasaas u ah waxa maanta caalamku la wada dagaalamayo oo la aaminsan yahay caalamka saddexaad gaar ahaan qaarada Afrika, waxa ugu badan ee fadhiidka ka dhigay ee nidaam-yadooda aad iyo aadka u burburiyay waa musuqmaasuqa, waanad la socotaan taa oo xisbiga KULMIYE xukuumada ka dhisnayd aad iyo aad ayay u tayeysay oo hay’adaha dabo-galka hantida oo ay ka mid tahay hay’adda la dagaalanka musuqmaasuqa ayay samaysay, waxay samaysay dawlad kooban, waxay samaysay in hay’adda hanti-dhowrka la dardargaliyo oo hawlo faro badan ayay qabteen”
Md Maxamed Kaahin Axmed waxa uu tilmaamay in dhaqaalaha dalka wax badan laga qabtay “Dhaqaalaha wax badan ayaa laga qabtay oo kor ayuu u kacay dhaqaluhu, mushaharooyinka shaqaalaha ayaa bil walba dhamaadkeeda la bixiyaa, waxaanuna rajaynaynaa in kasta oo mudadu yar tahay in dadaalku halka uu imika marayo laga sii kordhiyo.” Ayuu yidhi waxaanu intaa sii raaciyay “Sidii aynu dhaqanka u lahayn nabadgalyada aynu u xoojin jirnayna aynu u xoojino, meelaha

Tuesday, January 4, 2011

Hargeysa: Tuug Faro Baas Ku Haya Gaadiidka Yar Yare Ee Xaragada, Kalana Baxa Indhaha Iyo Muraayad- Haadda

Hargeysa  (BCT)-  Kooxo Tuug ah ayaa in dhawaaleba faro baas ku hayey gaadiidka yaryar ee lagu xaragoodo ee caasimada Hargeysa, kuwaas oo kala baxa Indhaha (Light) iyo Muraayad Haadada kadibna dib uga iibiya suuqa, isla markaana la sheegay in laga siisto qiimo ku dhaw $30.

Tuugtan oo ka qadhaabta Parking-nada gaadiidka yaryar la dhigo ee Hargeysa ayay cabasho ka muujiyeen dadka gaadiidka yaryar ku tamashleeya, kuwaas oo sheegay in mudooyinkan dambeba ay Tuugtaasi kordhiyeen xirfada ay ku xadayaan qalabkaasi.

Ismaaciil Maxamuud oo ka mid ah raga ay tuugtaasi kala baxday baabuurkiisa Indhaha Laydha ee hore iyo Muraayad-haadda, ayaa isaga oo arrintaa ka xog-waramaya yidhi  “Tiraba laba jeer ayaa la igala baxay muraayad-haadda gaadhigayga, waxaana markii ugu horeysay la igala baxay anigoo dhigtay gaadhiga meel suuqa dhexdiisa ah, maalmo ka dib markii aan Spare Parte-ka uga soo iibiyey Indho cusubna, mar labaad ayaa waxa la igala baxay anigoo ku sugan  meel baarkin ah oo aan sidaa uga fogayn Masjidul Jaamaca Hargeysa oo aan qof ka soo eegaayay dawlada hoose”.

Indhahan iyo Muraayad Haadyada gaadiidka ayaa marka laga yimaado tuugtan ku mamtay inay kala baxaan, isla markaana dib uga iibiyaan suuqa, ay faa’ido u leedahay gaadiidka xiliyada habeenkii iyo marka ay dib uga baxayaan meel ay taagnaayeen oo muraayad haadku ay ka arkaan wixii ka dambeeya ama daba maraya baabuurka si aanay shil u galin.

Si kastaba ha ahaatee Wajigan cusub ee Baabuurta kala baxayaan qaybo ka mid ah qalabka ayaa horseedi doona haddii aan si degdeg ah wax looga qaban inay sii baahdo ama gabi ahaanba ay bartaan sida tuugta caalamiga ah inay baabuurta xadaan, isla markaana si fudud ay si fudud u badali karaan Engine Numberka iyo Nambarada kale, taas oo hadhow ay adkaato in wax laga qabto.

Dalka Iran oo Lagu Del-Delley Todoba Qof oo lagu Eedeeyey Inay Ka Ganacsanayeen Maan-dooriyaha Daroogada & Iran oo Sheegtay In Nidaamkaa lagu Illaalin karo Nabad Gelyada Guud

IRAN(BCT)- Dalka Iran ayaa maanta lagu del-delley todoba qof oo la sheegay inay iibinayeen Darooggo. Mas,uul ka tirsan maxkamada sare ee dalka Iran ayaa sheegay inay maanta Del-deleen Todobadaa qof oo lagu soo Eedeeyey inay ka baayac-mushtareynayeen Daroogada iyo waxyaabaha maanka dooriya, Todobadaa qof ayaa lagu del delley magaalada lagu magacaabo Karminshaah ee galbeedka dalka Iran,

Wakaalada wararka ee FARIS ayaa shegtay in mas,uulka ka tirsan maxkamada oo lagu magacaabo Mujtabi Maaliki uu u sheegay wakaalada in maxkamadu diiday dallab ku saabsanaa in nimankaa la saamaxo ama laga dhaafo in la dillo, Maaliki ayaa intaa ku daray in Todobadaa qof mar qudha la wadda del-delley iyadoo dilkaa ama del-dellaadaa lagu fulliyey saldhig Boolis oo ku yaalla magaaladaa kadib markii maxkamadu soo amartay in la khaarajiyo,



Wakaalada Wararka ee FARIS ayaa sheegtay in todobadaa qof lagu soo Eedeeyey inay dalka soo galin jireen daroogada gaar ahaan maandooriyayaasha  Heroin & Cocaine,
Dalka Iran ayaa sanadkan cusub ee 2011 dadka lagu del delley ay illaa iminka gaadhayaan 11 qof warbixin ay soo saartay wakaalada wararka ee AFP oo ay sheegtay in lagu daabacay wargeysyada maxaliga ah ayaa lagu qoray in 179 qog lagu del delley dalka Iran sanadkii 2010, Halka sanadkii 2009 lagu del delley 270 qof,



Dalka Iran ayaa kamida waddamada ugu badan caalamka ee fulliya dilka nooca del-dellaada ah iyadoo ay lamid yihiin waddamada Shiinaha & Sucuudiga & Mareykanku, Mas,uuliyiinta dalka Iran ayaa sheegay in qaanuunkan ah in la dillo dadka lagu qabto Tuugada & Sinada & Daroogada  uu yahay mid munaasib ah isla markaana ah dariiqa kalliya ee lagu illaalin karo nabad gelyada dadka shicibka ah ee Reer Iran,
Xukunkan dilka ah ayaa lagu fulliyaa dalka Iran dadka lagu qabto ama sameeya denbiyada ay kamidka yihiin Dilka & Kufsiga & Ka ganacsiga Daroogada & Qofka lagu qabto hub billaa sharci ah,



Monday, January 3, 2011

SAWIRKA MAANTA: Aqal Soomaali Xusuuso Dhaqankii Hooyo

Sawirka Maanta Ee Shabakada Caalamiga Ah Ee Burcotoday Waa AQAL SOMALI, Waxaan Idiin Soo Xulnay Laba Aqal Soomaali oo Runtii Aad u Qurux Badan Una Xusuus Badan, Labadan Aqal Mid kamida Ayaa Sida Sawirka Ka Muuqata Aad Loo Qurxiyey Midna Waa Caadi, Sababta Idinkaa La Idinka Rabbaa, Waxa kaloo La Idinka Rabbaa Wax-yaabaha Ama Qalabka laga Sameeyo Aqal Soomaaliga, DAAWASHO WACAN

Xaaji Cabdi Waraabe Oo Ka Digay Shaqaalaha Dawlada Ee Imtixaanada Lagu Dhimayo, Uguna Baaqay Xukuumadda Inay Wax Ka Qabato Tuugta Amaan Darada Dalka Ka Wada

Xaaji Cabdi Waraabe Oo Ka Digay Shaqaalaha Dawlada Ee Imtixaanada Lagu Dhimayo, Uguna Baaqay Xukuumadda Inay Wax Ka Qabato Tuugta Amaan Darada Dalka Ka Wada “Dawlad Waxaanad Filayni Wey Kaaga Soo Baxaan, Shaqaalaha La Qaadanayo Waa In Loogu Horaysiiyo Tuugta Bilayskuna Wuu Yaqaanaa, Wasiirku Kolka Uu Amarka Bixinayo Waa Inuu Waayo Araga La Tashadaa, Nin Shaqaynaya Shaqada Iiga Eri Dhaqan Aynu Lahaan Jirnay Maaha” Xaaji Cabdi Waraabe
Hargeysa, January 3, 2011 (Togaherer.com) – Odayga ruug cadaaga ah ee ugu da’da weyn xildhibaanada labada aqal ee Baarlamaanka  Somaliland Xaaji C/kariim Xuseen Yuusuf (Cabdi-Waraabe) ayaa xukuumada uga digay Imtixaanaadka ay ku dhimayso shaqaalaha dawlada, uguna baaqay shaqaalaha wasaarada Maaliyada ee ku dhacay Imtixaanadii dhawaan laga qaaday ee Mudaharaadka sameeyey shalay ay joojiyaan rabshadaha guddi kooban oo xukuumad la xaajootana iska soo saaraan.
Xaji Cabdi-Waraabe waxa kale oo uu ka digay xaalada amaanka caasimada iyo Tuugtii madaxweyne Siillaanyo cafiska u fidiyay badhtamihii bishii August ee sanadkii 2010-ka oo uu sheegay inay dadweynaha caasimada ku dhaqan cabsi amaan daro ku hayaan, uguna baaqay in ciidamada amaanku ay si dhakhso ah ugu hawl galaan wax ka qabashada kooxaha Tuugta ah ee dilaacay.
Xaaji Cabdi-Waraabe oo xog waran kooban oo khaasa wargeyska Haatuf shalay kula yeeshay caasimada Hargeysa ayaa sidoo kale shacbiga ugu baaqay in amaanka ilaalintiisa ay ku hawl galaan.
Xaaji C/kariin Xuseen (Cabdi-Waraabe) oo ka hadlaya mudaharaadka shaqaalaha Maaliyada waxa u yidhi “Qalad  tirada intaa leeg  ee shaqalaha  ah ee la yidhi shaqo beelaa  inay buuq sameeyaan maaha waa inay si miyir qaba wax u sheegtaan, shaqaale muddo dheer soo shaqaynayay-na in hoos loo eegaa weeyi Miyirbaa hadii xaajada hoos ha loo eego Imtixaana laguma gali jirin shaqada nin Geela ka yimid ayaa shaqada gali jiray nin soo shaqeeyay oo xaas leh oo baahan in hoos loo eegaa weeyi, qolada la dhimayna inay Mudaharaad iyo rabshado wax ku doonin, waa inay guddi samaystaan madaxda ula hadasha ayaa looga baahan yahay, xukuumadu hoos haw u eegto xalkaas, Mudaharaad iyo qalalaase  uma baahin, nin gar leh oo diriray iyo nin bilaawe leh oo margaday ayaa raga ugu liita, dawlad-na  waxaanad filaynin wey kaaga soo baxaan ama ha kaa farxiyaan ama ha kaa nixiyaane ninka buuq sameeya gartiisa la qaadi maayo, madaxduna xaalka shaqaalahaasi wax ha ka qabtaan hoosna ha u eegaan nin Jaamacad ka soo baxay iyo Oday muddo dheer soo shaqaynaayay marka la yidhaahdo  ku loolama shaqada waa arin adag, ninbaa shaqo kaaga eryayaana iyo meel soo eego dabeecad inagu cusub weeyaan goorteeda aynu gaadhno shaqaale Imtixaan soo wada mara cagta u dhiga oo talada qaboojiya.”
Xaaji Cabdi isagoo ka hadlaya saamaynta ay nabad galyada ku yeelan karto kacdoonka shaqaalaha ka bilaabmay iyo amaanka caasimada ee Tuugta faraha baas ku haysa dadweynaha waxa u yidhi “Waxaan leehay masuuliyiinta xukuumada yaan nabad galyada la dhaawicin, idinkoo is leh wax wanaajiya yaynaan hantaaqo ku dhicin arinkana tukubiya deg-degena iska ilaaliya, waxa run ah in Tuugtii xabsiyada laga soo daayay ee la cafiyay habeenkii lagama seexdo oo waa kuwaa Haweenka Biriishyada ka tuuraya ee tooriyaha la dhacaya arinkaana waa in xukuumadu wax ka qabataa. Ciidanka Bilaysku-na waa inay xaafadaha caasimada haabeenkii Roondooyin u diraan, Wasiirku kolku amar bixinaayo ama talo gaadhayo waa inuu Odayaasha waayo araga ah talada ka qayb galiyo si aanay dhalin yaradu ugu buuqin oo aanay u kicinin waa la tilmaamayaa, Tuugtu waa rag rag ah ee nacasyo maaha tuuriyaha ha iska dhigaan tuugana lama waayayo waase la kala talo wanaagsan yahay haddii dadka laysaan idinkana waa la idin dili, haddii se wax yar xadaan sidaa maanta la idin soo daayay ayuunbaa la idin soo dayn doonaa. barigii hore Somaliland waxay lahayd Tuug wanaagsan oo aan wax dili jirn Mindiyo-na aan sidan jirin colkan Minidyaha iyo faashashka sitaa ha iska dhigaan sanadka soo socda badhtamihiisa waxaan filayaa in la waayi doono cid bilaa camal ah oo shaqooyinka laga naadin doono suuqyada sida ay xukuumada cusubi ee talada haysaa ay u muuqato, Warshadii Sibidhkaa la furi doonaa, Shidaalka dalkaa la soo saari doonaa jidadka iyo Madaarada ayaa la samayn doonaa, waxaan leeyahay shaqooyinka la abuuri doono ha loogu horaysiiyo inamada Tuugta ah ciidanka Bilaysku-na wuu yaqaanaaye ha lagu jiheeyo shaqooyinka ugu horeeya ee soo baxa ayaan ku talinayaa.

Sanad Guuradii 28 Aad ee Hawlgalkii Badbaado ee lagu jebiyay Jeelka Mandheera (02/01/1983)

Taariikh xusuus Mudan Xus oo Xusuusnow

Hawlgalkii Badbaado ee lagu jebiyay Jeelka Mandheera (02/01/1983)

Dooddigii Mandheeree
Laga Qaxay Dayaankiyo
Darban baan ku dhaartay
(Daalalo, Hadraawi)






Muj. Maxamed Xaashi (Lixle) oo ahaa Hoggaamiyihii Guud ee Hawlgalka

Lixle Damacyadiisii
Diric Ina Saleebaan
Duxan baan ku dhaartay
(Daalalo, Hadraawi)

Hawlgalladii gudaha ee SNM guulaha ka gaadhay waxaa ka mid ah Jabintii jeelka Mandheere. Hawlgalkaa Jeelka Mandheera lagu jabiyay  oo ahaa jeelka 3aad ee ugu weyn dalkii la isku odhan jiray Soomaaliya kaasoo dhacay 02/1/1983kii hawlgalkaas oo ay fuliyeen koox ka tirsan Halgamayaashii SNM, iyagoo hawlgalkaa ku furtay dad badan oo maxaabiis ahaan ugu curduduubnaa jeelkaas oo uu taliskii Siyaad Barre u adeegsan jiray cabudhinta iyo cadaadinta dadkii ku noolaa goboladii waqooyi (Somaliland).
Hawlgalkaas oo loogu magac daray (Badbaado) waxa uu ku beegnaa 02 January 1983kii, waxaa hogaaminayay halgamayaashii SNM ee hawlgalkaa fuliyay Ilaahay ha u Naxariistee Muj: Maxamed Xaashi Diiriye (Lixle) iyagoo ka soo ambabaxay saldhigii Gaashaamo oo uu taliye ka ahaa Muj: Maxamed Kaahin Axmed, kuwaas oo ku guulaystay hawlgalkii ay fulinayeen, iyagoo u soo babac dhigay ciidamadii cududa isbidayay ee ka amar qaadanayay taliskii Muqdisho ee Siyaad Barre.
Hawlgalkan oo ah mid aan qoraal kali ah lagu soo koobi karayn waxa aynu maalmaha soo socda soo bandhigi doonaa isagoo faahfaahsan balse maanta qormadan oo hordhac ah waxa ugu horeyn munaasibadan hadal kooban ka yidhi Muj: Boobe Yuusuf Ducaale oo ah qoraa wax ka qora taariikh halgameedkii SNM in badanasoo shaqeeyay qaybtii warbaahinta ee SNM maqaal taariikheedkana noo soo gudbiyay.
Waxaanu yidhi “marka laga hadlayo Mandheera inta muhiimka ahi waxa weeye dabcigii uu lahaa halgankii SNM ay soo gashay, oo aad arkayso in labada arrimood ee ugu muhiimsan hawlgaladii ay fuliyeen xoogagii SNM inay ahaayeen hawlgalkii jebinta jeelka Mandheera oo SNM ugu suntanaa (Hawlgalkii Badbaado) iyo hawlgalkii lagu baxay Muj: C/laahi Askar oo isna loo yaqaanay hawlgalkii (Bad-Jeex).
Labadaa hawlgal waxay tilmaamayaan awwoodii ay SNM lahayd oo ku dhisnayd laba tiir oo kala ah taageeradii ay dadku siinayeen halgankii SNM iyo Illaahay oo u hiilinayay maadaama ay xaq ku socdeen.” Ayuu yidhi Muj: Boobe isaga oo iftiiminaya baalka uu hawlgalkaasi ka galay taariikhdii SNM.
Hawlgalkan waxa si faahfaahsan uga waramay Ilaahay Naxariistii Janno ha ka waraabiyee Mujaahid C/|Xakiim Maxamed Aaden oo ka mid ahaa hogaamiyayaashii kooxda SNM ee hawlgalkaa fuliyay isaga oo bishii January 1992kii uga waramay C/laahi Maxamed Daahir (Cukuse) oo markaa ka mid ahaa weriyayaasha Radio Hargeysa cajalada waraysigaasi ku duubanyahayna waxa noo soo gudbiyay Muj: Boobe Yuusuf Ducaale oo lagu yaqaan ururinta taariikhda halgankii SNM.
Ilaahay naxariistii janno ha ka waraabiyee Muj: C/Xakiim Maxamed Aaden (Sumuli) waxa uu ku geeriyooday Degmada Sheekh sanadkii 1995kii.
Waxaanu hadalkiisa ku bilaabay isagoo ka hadlaya sidii ay hawlgalkaa u soo qaadeen iyo sidii ay u fuliyeenba ” Hawlgalkaasi wuxuu ahaa laba weji, oo kala ah mid siyaasi ah oo ah sidii looga dhaadhiciyay dadkii meeshaa degenaa inay gacan na siiyaan oo na qariyaan anagoo ogolaysiinay taa odayaashii iyo rag kale ka tirsanaa saraakiishii milatari ee ciidankii meeshaa deganaa, iyo sidoo kale gaadiid nala shaqeeyayba Markaa ka dib ayay noo suurta gashay in aanu ciidan gayno agagaarka buurta Gacan libaax” ayuu yidhi Muj: C/Xakiim.
Ka dib wuxuu u gundo degay sidii ay ku soo ambabaxeen iyo siduu jawigu ahaa, waxaanu yidhi “Ciidanku wuxuu ka dhaqaaqay Gaashaamo oo uu taliye ka ahaa Muj: Maxamed Kaahin Axmed oo hawshaas kaalin weyn ka qaatay. Madaxdii maalintaa na sagootiday waxaa ka mid ahaa Xasan Aaden Wadaadiid oo ahaa gudoomiye ku xigeenkii SNM. Hawlgalkaana waxa hogaaminayay Alla ha u naxariistee Muj: Maxamed Xaashi Diiriye (Lixle), waxaanu ka dhaqaaqnay Gaashaamo 11:00 habeenimo. Markaanu marayno meel Gorayo Xun la yidhaahdo ayuu gaadhigii naga xumaaday isagoo noo dhaqaaqi waayay, markaas ayaanu dib u soo noqonay, balse todoba maalmood ka dib ayaanu dib ugu noqonay.
Habeenkaa dambe 10:00 fiidnimo ayaanu ka dhaqaaqnay Gaashaamo habeenkii oo dhan ayaanu sii guuraynaynay, meesha la yidhaahdo Go’da Weyn ayaanu ugu galnay markay Saacadu ahayd 5:00 subaxnimo 15 isjiid oo ciidamadii faqashta ah oo halkaa hurda.
Aniga, Xayd iyo ninkale oo sarkaal ahaa la yidhaa C/Raxmaan Maxamed Case oo naga mid ahaa waanu isu iljebinay markaanu aragnay 15ka isjiid ee magaalada badhtankeeda taagan. Waanu tashanay oo waxaanu isnidhi maxaynu samaynaa haddii la ina arko, ama ay inala hadlaan. Waxaanu gudoonsanay islamarkiiba hadday ina ogaadaan inaanu iyagaba ku bilawno oo aanaan halkiiba gaadhin baabuurtana ka qaadno.
Gaadhigu wuu naga biyo la’aa magaalada dacalkeedaanu joojinay aniga iyo nin mujaahida ayaanu magaaladii, anagoo qoryahayagii sidana dib ugu soo noqonay, foosto hudheel hortiis taala ayaanu biyo ka shubanay, waxa noogu yimid nin askari ah isagoo nagu yidhi maxaad ahaydeen? Waxaanu nahay boolis la socda ciyaartoy ka

yimid Ceerigaabo ayaanu ku nidhi.
“Dabadeedna wuu iska noqday, halkiisiibuuna istaagey, waxaanu go’aan ku gaadhnay aniga iyo inankii kale ee Mujaahidka ahaa ee biyaha ila dhaaminayey hadduu qof la hadlo waynu ku bilaabaynaa rasaasta ileyn waa la inaga shakiyayaaye, cidna lamuu hadal nasiib wanaag waanu iska dhaafnay gaadhigayagii baanu biyeysanay, waxaanu ku wada hadalnay markaanu marayno meesha la yidhaahdo Go’da weyn ee aanu xagan Cadaadley u socono oo uu ku soo jira alla ha u naxariistee Maxamed Xaashi Lixle buurta weyn ee gacan Libaax sinteeda, ayaanu tooshash cadaan, iyo casaan ah oo afgarashadayada ahayd ayaanu isu shidnay, wuxuu noo sheegay in wadadii aanu ka kori lahayn buurta gacanta in 250 nin oo daraawiish ahi fadhiyaan, waxaanu noogu sheegay tooshka afgarashada, dabadeedna dib baanu u soo noqonay, markii aanu soo noqonay nimankiina aanu ku soo dhaafnay Go’da weyn ee 15-ka isjiid ahaa baa naga horyimid, iyaga oo soo dhaqaaqay, wadadii baanu dhinac iska taagnay, waxba ismaanu shidin, qunyar baanu iska fadh-fadhiisanay, iyaguna way na dhaafeen.
Dabadeedna waxaan aad iyo aad u xusayaa inamadii mujaahidiinta ahaa ee 45-ka ahaa ee hawlgalkaa nala fuliyey, oo aad iyo aad rag geesiyaal ah u ahaa, isla markaana rag aad u calool adag ahaa, waxaananse weligey ilaawayn ninkii dirawalka gaadhiga ahaa oo isaguna Mujaahid aad iyo aad u calool adag ahaa, weliba aan deeggaankan aanu marayno dadka ku dhashay ee deegaankaas ah aan ahayn.
Baabuurkii ayaanu rasaastii iyo waxayagii kala degnay oo gaadhigii baanu soo deynay saacadu markay ahayd 9:30 subaxnimo, waxaananu ku nidhi tuulo keliya ha dhaafin, waad wada maraysaa, dhuxulna dushaanu kaga sii daadinay, dhuxulayaal iska dhiga ayaanu ku nidhi saddex mujaahidna waanu raacinay, iyagana dhuxul baanu mar-marinay, waxaananu ka dhigney kuwii dhuxusha xamaalayey dhuxusha.
Tuulana ha dhaafina oo tuulo walba waxaad ku tidhaahdaan waar wax dhuxul ahi may yaalaan ayaanu ku nidhi.
7:30 fiidnimo ayuu Gaashaamo galay gaadhigii.
Maxamed Kaahin oo ahaa taliyihii ciidankaa soo direy ayuu dabadeedna u geeyey warbixintii.
Alaabadayadii tuurtaanu ku qaadanay, 45 nin baanu ahayn Maxamed Xaashi Lixle falaytkii ugu horeeyey ee aanu samayno waxa uu nagu yidhi qof aan tukanini ma idinku jiraa, waana ereyga aanan weligey ilaawayn, dhawr mujaahid baa yidhi haa, wuxuuna yidhi imika maryihiina ku maydha durdurkan waynaynu wada tukanaynaa nin aan tukanayn dagaal wada geli mayno.
8 habeen iyo 8 maalmood ayaanu sahansanaynay jeelka Mandheera, 2-dii January ee 1983-kii ayaanu weerar ku qaadnay, waxaananu soo galnay buurta Gacan Libaax 25-kii December ee 1982-kii, waxaanu ka dhaqaaqnay socodkayaga habeenkii aanu ku duulaynay meesha la yidhaahdo Aadan Tuuksade, doox  buurta  Gacan Libaax hoosteeda ah, wixii intaa aanu ku sii socona noo soo gala waanu qabanaynay manaanu sii daynayn, halkaa aanu habeenkaa joognay inan yar oo geel jire ah baa noogu soo galay oo deegaanka dadka ah biyo dhaanso buu is-yidhi, waanu qabanay, maxaad noo malaynaysaa baanu ku nidhi dee ciidan dawladeed buu yidhi, habeenkii halkii buu nala joogey wuxuu yidhi geel baa iga baxsanaya deyreh waxba ma oga waxaanu ku nidhi geelu buurtan ma dhaafayo ee iska fadhi.
Halkii buu nala fadhiyey habeenkii iyo maalintii dambe, habeenkii aanu dhaqaaqaynay ayaanu sii deynay fiidkii intaanan meesha ka kicin, waxaananu ku nidhi afkaaga waxbaan arkay ha ka odhan, hadaad tidhaahdo waa lagu dili, nasiib darro inankii operation-kii Mandheera markuu dhacay 7-ba maalmood ka dib ayuu sheegay oo uu leeyahay nimankaa waan arkay, waana la qabtey waana la diley.
Aadan Tuuksade ayaanu socod ka bilawnay markay ahayd 4-tii galabnimo, qorshahayagu wuxuu ahaa inaanu Abdaal tagno dabadeedna halkaa ka qabsano 3 baabuur ama 4 baabuur oo Landcrueser- ama landrover-o ah oo aanu operation-ka Mandheera ku samayno, marka aanu dhamaynayna Berbera, marka aanu dhamaynayna haddana Sheekh, haddana Burco, dabadeedna aanu halkaa ka baxno oo aanu habeenkaa intaa isu marno Ilaahay isaga ayaa og sida inoo danta ah.
Waxaanu istaagnay 9:00 fiidnimo laamida u dhaxaysa Hargeysa iyo Berbera (Abdaal), waxaanu isu jirsanay laba qaybood intaanu iska dhignay 3km, waxaanu haysanay laba Radio oo yar yar markaa ninka xaga Hargeysa xigaa gaadhiguu sidaa u eegayaa haddii uu y ahay kaan rabnay qabo ayuu ku odhanayaa ka kale ee dhinaca Berbera xiga, ka dhinaca Berbera xigaana sidoo kale.
Waxa cajiib ah oo aanan weligay imika markaan xasuustaba aanan filan, aan Idhaahdo siday u dhacday amar Allah mooyee, ayaa meesha nagaga dhacay, 9:00 fiidnimo ilaa 3:30 habeenimo weyn gaadhi landcrueser ama Landrover ama nooc kale oo aanu hawlgalkaa ku fulino.
3:30 markay ahayd gaadhiga meesha marayaana yahay cresida ama gaadhi weyn oo ilaa dhigaha raran ayaa gaadhi eenataray ama isjiid ah oo madhani na soo marey kii baanu qabanay waxaanu tagnay Mandheera.
Sidaanu hawlgalka u samaynayna waxay ahayd 29 nin oo aan wato waxa loo direy xerada milatariga oo ay degen yihiin 1500 askari lagana hayo waardiye 12×8 ah, Lixle iyo 9 uu wataana waxay qabteen jeelka si ay u sii joogaan intaanu halkaa soo dhamaynayno, xerada milatariga hadaanaan qaban noo suuro geli mayso inaanu jeelka jebino, ama aanu wax ka samayno, waayo way nagu soo dhaqaaqayaan.
29 Mujaahid, aniga iyo nin kale oo sarkaal ahaa oo la yidhaahdo C/Raxmaan Maxamed Case ayaa la galnay xeradii, Ilaahay mahadiis weeyaan, xoog aanu leenahay iyo raganimo kumaanu qaban, waxay nagu qaadatay 20 daqiiqo intaanu xeradii ku qabsanaynay iyada oo dhan ciidankana kaga sifaynaynay, markaa ka sifaynay ee aanu ogaanay inaanay xerada wax ku jirin wixii dhintey mooyaane ee aanu istoodhkii rasaastana ka jajabinay ayaanu isaga soo baxnay waxaanu Lixle jeelki baanu ku dhufanay baasuuke albaabkiisii aniga iyo 15 Mujaahid ayaa galay, gudaha ayey nagula dagaalameen waxoogay meel madaw, tiina Illaah guushii wuu naga siiyey, dabadeedna waan yara asqoobay rasaastii faraha badnayd iyo suntii, waxaan garan waayey qolkii ay ku jireen odayaashii Isaaq ee siyaasada u xidhnaa oo waxa iga halawday nashqada, nin laba dagaal galay baan ahay, markii horena xerada ku soo dagaalamay markii dambena jeelka gudihiisa, dabadeedii baaruudii iyo sanqadhii ayaan qolkii garan waayey, waan istaagay waxaanan idhi waar odayaashii reer Sh. Isaxaaq meeye, intaan qayliyey.
Show waaban hortaagnahay, Ismaaciil X. Cabdi nin la yidhaa alla ha u naxariistee ayaa yidhi ma Cabdi Sumuni baa, markaasaan idhi haa ayuu yidhi waar waa na kan, dabadeedna qufulkii baan ka jebiyey, waananu soo saarnay, Lixlaa kaxeeyey Alla ha u naxariistee, aniguna ciidankii baan meeshii kula hadhay, si hadday raadco reeb iyo waxaasi hadday soo baxaan aan uga reebo, waayo waa odayaal fara madhan, aniguna ciidankiibaan la dabasocday, waxaanu tagnay garka Gacan Libaax hoostii, waanu ku qadaynay, aniga iyo odayaashii halkaa waxa nagu soo gaadhay markay ahayd 4:30 galabnimo  320 (Sadex Boqol iyo Labaatan)  nin oo ciidanka daraawiishta ah, dabadeed halkaa dagaal baa nagu dhexmaray, Illaahay markaana guusha wuu naga siiyey. Markaa waanu israacnay ciidankii iyo odayaashiiba anaga oo wadana, dhexdaanu isu qaybinay inuu isaguna ciidanka kaxeeyo oo uu gooni mariyo aniguna odayaasha iyo inan mujaahid ah (Cabdi Kaydsane) I raaco oo aanu wado gooni ah marno, oo waanay wada socon karayn odayaal fara madhan iyo ciidan hubaysani, markaa anigu markii aan habeenkii halkaa u hooyey, habeenkii 2-aad baan ka soo daadejiyey buurta ciidanka faqashta oo buurta gacan Libaax hoosteed safan ayaan soo dhexmariyey, waxaanan soo mariyey wadada la yidhaahdo Shilmaale, dabadeedna Hara-Sheekh, dabadeed waxa halkaa naga soo baxay nin la yidhaa Ibraahim X. Axmed wuxuu yidhi waa idin qaadayaa waxaanan idin dhaafinayaa banka  Tuunyo, waxaan idhi waxaan dadkeena ahayni meesha ma joogaa, haa buu yidhi nin beerta iiga shaqeeya ayaa jooga oo maxay ah waa aboo ayuu yidhi, I tus ayaan idhi, maxaad ku falaysaa buu yidhi, waaan dilayaa ayaan idhi, waayo buu yidhi, wuu ku sheegayaa anagana waa nala soo gaadhi, waayo nimankani waxay u wada shaqeeyaan wardoonka milatariga, adna waa lagu dili anagana waa lana soo gaadhi, wuu diiday haddaba aan kaa kaxeeyo oo aan wadankiisii geeyo ayaan idhi waa Itoobiyaan’e, tiina wuu diiday, ina Maxamed Siraad Alla ha u naxariistee ayaan idhi ninkan la hadal malaha wuu waalan yahay’e ninkaniy’e.
Isna waa is-haligayaa, inaga waa ina haligayaay’e, wuu na diiday, calaa ayi xaal gaadhigii buu nagu qaaday, Hara-Sheekh buu na geeyey oo 14 nin joogaan, waanu ka degnay sokadeeda, dabeetana gaadhigii halkii baa askartii faqashtu ku qabsatay, banka tuunyo ayaan habeenkii lugeysiiyey, nasiib wanaag markuu waagu baryey ayaan u talaabiyey meel la yidhaahdo Maraaboli oo aygii ah, habeen kalena waan la sii dhaxay, habeen saddexaadkiina xuduuda ayaan ka talaabiyey, dabadeedna meel la yidhaahdo Ramaale ayaanu tagnay.
Maalintii aan talaabaynay Gaani baa meesha marayey, iyo dayuurado helicopters- ah iyo beebeeyaal, anaguu na doon-doonayey. Raamaale meel la yidhaahdo ayaan geeyey, dadkii baa nagu soo yaacay, halkii baanu baabuur ka raacnay sidii baanu ku tagnay Gaashaamo.
Maxamed Xaashi Lixle isagu ciidankii wuu raacay Isku-dir meesha la yidhaa ayey ka soo wareegeen, iyo Qaylo-Ma-Yalaasi, halkaa markuu marayo ayuu isagu Burco ku leexday, waxaanu galay Burco, muu soo raacin ciidanka, waxaa soo kaxeeyey sarkaalka la yidhaahdo C/Raxmaan Maxamed Case iyo sarkaalka la yidhaahdo Xayd, dabadeedna Gaashaamo ayey keeneen ciidankii oo nabad qaba”.Sidaa waxa hadalkiisa ku soo gebagebeeyey alla ha u naxariistee Mujaahid C/Xakiim M. Aadan oo uu C/Laahi Cukuse ku waraystay Radio Hargeysa, isla markaana cajalada aanu ka qornay waxa aanu ka helnay Mujaahid Boobe Yuusuf Ducaale.

Guddiada Xidhiidhka Ciyaaraha Fudud Ee Somaliland Oo Ku Dhawaaqay In Ay Qabanayaan Tartanka Orodada Ee half maratonka +SAWIRO

Hargeysa(Burcotoday)- Wasaarada Dhaliyada Iyo Ciyaaraha iyo gudida xidhiidhka ciyaaraha fudud ee Somaliland ayaa maanta si wada jir ah ug dhawaaqay in 20. Bishan la qabanayo tartanka orodada oo ay ka soo qayb galayaan dhamaan dhaliyarada reer Somaliland.

Tartankan oo uu maalgalinayo Ururka wadaniga ah ee ODXA isla markaana ay fulinayso Guddida xidhiidhka ciyaraaha Fudud, ayaa waxa ka qayb galaya Guud ahaan dhalinyarada reer Somaliland, waxa tarankan sadexda qof ee ugu sareeyaa ay ka qayb galidoonaan tartan orodeed caalami ah oo lagu qaban doono wadanka Djabuoti 21.bisha labaad ee sanadkan.

Munaasibada loo qabatay ku dhawaaqista tarankaas oo maanta ka dhacday Xarunta Waaxda Dhaqanka ee Wasradaasi ayaa ka soo qaybg galay Agaasimaha Guud ee Wasaaradaasi Md.Mustafe Maxmuud Qodax, Gudoomiyaha Ururka OXDA marwo Faadumo Saciid, Gudoomiyha Gudida xidhika ciyaha Fudud Cumar Qoobwanaaje.

Ugu horayn waxa munaasibadaasi ka hadalay Agaasimha waaxda Olombikada Somaliland Md.Maxmed Ciro waxa uu sharaxaad ka bxiyey tarankan hadaladiisina waxa ka mid ahaa “ waxaan maanta halkan isugu kiin yeedhany in aan ku dhaqano tartanka Oradeed oo lagu qabanayo 20 ka bishan magaalada Hargeysa, waana tartan furan oo laga soo wada qayb galidoon, waxaan ka soo wada qayb galidoona dhamaan cidii ay u suuroobayso, waxana hawshaas maaligalinaya ururuka OXDA oo ay hormood u tahay Marwo Faadumo Saciid waxana fulinaya Xidhiishka kubada cagta, waxana aanu rajayanayaa in dhamaan Cidi walaba gacan ka gaysato arintaas.”

Waxa kale oo halkaasi ka  hadalay Agaasimaha Guud ee Wasaarada dhaliyarada Ciyaaraha Hidaha Iyo Dhaqanka Md.Mustafe Maxmuud Qodax waxa hadaladiisii ka mid ahaa “ waxa aynu maanta halkan kaga dawaaqaynaa tartanka orodada, waxana aanu aad ugu mahad naqaynaa marwo faadumo saciid oo maalgalinaysa hawshan, waxa kale oo wax weyn noo ah in ay marwalba na tusayso dhiiri gallin, waxana ay taasi na tusaynaa rajo weyn, waxana aanu rajaynaynaa in tartan kani uu ka duwanaan doono tartanadii hore isla markaana la bixindoono abaal marino qiimo leh, sidii ay Faadumaba hore ugu dhawaajisay, taranakna waxa uu socondoonaa mudo waxana loo samyeey jadwal wanaagsan, waxa kale oo aan aad ugu mahadnaqaynaa Faadumo sida ay mar walba noo garab taagan tahay.”

Intaasi ka dibna waxa halkaasi ka hadashay Marwo Faadumo Saciid hadaladeediina waxa ka mid ahaa “ muhiimada aan shirkan jaraaid u qabanay waxa weeye in aan ku war galino dhaan dhalinyarada reer Somaliland in magaalada hargeysa laga qabanayo Taranka oroda ee (Half maratonka), bishan koowaad labaatankeeda waxan aanu tartankaas ugu talagalnay in aanu ku  bixino abaal marino aad u wanaagsan, waxa kale oo muhiimad gaara leh in sadexda qof ee uga sareeye tartankan in ay ka qayb galyaan Taratan kale oo caalami ah oo 21ka labaad lagu qaban doono wadanka Djabouti, waxan aaanu rajaynayaa in xubanahaasi ay taratankaas ku matali doonaan Somaliland isla markaana iyaga oo calanka Somaliland sita ay ka qayb qaadan doonaan taratankaas oo Afrika oo dhan looga imanayo, waxan aynu rajaynayaa in hadii aynu taratankaas aynu ku guulaysano waxa anu u gudbi doonaa tartamada wadamad kale, waxa kale oo hubaal ah in qaban qaabada tartankaasi uu yahay wax weyn una baahan hawl balaadhan waayo waa 21 mayl, waxan ay tahay in aynu dadaalno oo aynu dhalinyaradeeda tusno in ay aduunyadu tahay waxa weyn.”

Ugu damayntiina waxa halkaasi ka hadalay Gudoomiye ku xigeenka Guddiada Xidhiidhka ciyaara fudud Somaliland Md.Saciid Mire Sh Yoonis waxa uu sheegay in ay muhiim tahay in ay dhalinyara Reer Somalliland ka faaiidaytaan, isla markaan ay ka xidhiidh ahaan ka qayb qaatayaasha  tartankaas u diyaariyaan tababaro kala duwan oo la xidhiisha tartankaas, waxa kale oo uu sheegay in ay aad ugu dadaali doonaan in ay sii diyaariyaan ciyaartoyga ka soo baxa tartankan kuwaas oo ka qayb qaadanaya tartanka kale ee lagu qabanayo wadanka Djabouti si ay u noqdaan kkuwo u hanta guulo la taaban karo .

Sunday, January 2, 2011

SAWIRKA MAANTA. Walli Ma Aragtay Geel La Lisayo Daawasho Wacan

Sawirka Maanta Ee Shabakada Caalamiga Ah Ee BURCOTODAY Waa Hal La Lisayo, Waxaan Fillayaa Inay Qaar Badan oo Idinka Mid Ah Aanay Arrag Geel la Lisayo Markaa Bal Nalla Daawada, Waxaa laga Yaabaa Raggi Geella Lisi Jiray Baa Warkiisa Inoo Hay-ya,  DAAWASHO WACAN  

 

QAYBTII 3aad: Barnaamijka Dhacdooyinka Ugu Muhiimsanaa Sanadka 2010 Somaliland Iyo Caalamka (Special Program)

Diyaarada Siday Saanada Milatari Oo Maanta Dalka ka Duushay iyo Xukuumada Siilaanyo oo ka Hadashay

Hargeysa ( Burcotoday)- Diyaaraddii muddada bisha ku dhaw ku xanibnayd madaarka dayuuradaha  ee magaalada Hargeysa oo saanada millateri u siday maamul-goboleedka Puntland iyo weliba lix nin oo isugu jiray duuliyayaal iyo shaqaale, ayaa maanta gebi ahaanba ka duulay madaarkaasi, kadib markii la sii daayey.
Diyaaradda iyo shaqaalaha oo xukun xadhig iyo ganaax isugu jira ay maxkamadda gobolka Hargeysa Khamiistii toddobaadkii hore ku riday, ayaa sida la sheegay lixda nin ee watay ay gebi ahaanba iibsadeen xadhigii lagu xukumay, isla markaana la wada bixiyey dhammaan ganaaxii la saaray iyaga iyo diyaaraddaba, halka qalabkii ay siday Somaliland la hadhay.

Wasiirada Arrimaha Gudaha, Arrimaha Dibada iyo Duulista iyo Hawada iyo weliba Taliyaha guud ee ciidanka booliska iyo Xeer-ilaaliyaha guud oo ka hor intii aan la sii dayn diyaaradaasi shir shir jaraa’id ku qabtay madaarka, ayaa sheegay in agabka iyo saanadda ciidan ee diyaaraddu sidday u gudbin xukuumaddu u gudbin doonto golaha ammaanka ee qaramada midoobay.

Wasiirka Arrimaha dibada iyo Iskaashiga caalamiga ah Dr. Maxamed Cabdilaahi Cumar oo shirkaa jaraa’id ka hadlay, ayaa ka sheekeeyey heerarkii kala duwanaa ee kiiska diyaaraddani soo maray, waxaannu yidhi, “Xukuumada Somaliland waxay go’aansatay in ay arrintaas la socod siiso Golaha ammaanka, waxay noo soo direen gudi xaqiiqo raadis ah, gudidaasi waxay caddaysay in dayaaradani ay jabisay xeerkii tirsigiisu ahaa 733 ee ka soo baxay Golaha Amaanka, waxa kale oo cadaatay in ay jabyeen qawaaniinta Somaliland, intaasi ka dib waxa ciidanka ammaanku dacwad u gudbinay Maxkamada Gobolka, waxa ay si madax banaan u gudo gashay dhagaysiga dacwadaas.”

Wasiirka oo ka hadlayey sida lagu sii daayey nimanka la xukumay, waxa uu yidhi, “Waxay ka soo saartay go’aano isugu jira ganaax iyo xadhig oo lagu riday dadkii iyo dayaaradiiba, dadkaasi asalkoodu waxa ay u badnaayeen wadanka Ruushka. Waxa hore loo sii laba saxafi oo diyaarada rakaabka ka ahaa.
Maxkamadu markay nimkaas xukumaysay waxa ay u jidaysay inay xadhigooda iibsan karaan. Xadhigoodii iyo ganaaxoodiiba way bixiyeen iyo kii dayaaradaba sidaasi darteed xukuumaddu way fulisay go’aanka maxkamadda waana ay sii daysay lixdii nine ruushka ahaa iyo diyaaradiiba waa ku waa imika tagay ee madaarkan ka duulay iyaga oo bad qaba laguna sii daayey go’aan Maxkamadeed.”


Wasiirka Arimaha Dibada iyo iskaashiga Caalamiga ah ee Somaliland Dr.Maxamed Cabdilaahi Cumar ka hadalay Saanadii milatari ee ay Diyaaradu siday, oo uu sheegay inay ku wareejinayaan qaramada midoobay waxaanu yidhi “Saanaddii Diyaaradani siday oo aanu anagu dawlad ahaan u arkaynay in ay sharciga baal marsan tahay isla marnaana ay dunidiina nagu raacaday, isla markaana shacabka iyo xukuumada Somaliland ay ka mid yihiin Adduunka ayna ilaaliyanaa Qawaaniinta Caalimiga ah ee ay dunidu sida Guud u wada leedahay, qalabkaas oo ahaa mid mamnuuc ka ahaa Gobolka wareejinayaa qaramada midoobay Golaheedd nabadgeyada oo horena u hayay dacwadada arrintan.” aanu ku xukunayna ay ahaayeen kuwo ka soo baxay Golaha Amaanka, waxan aanu isda u dhakhsaha badan ku wareejinayaa qaramda midoobay Xafiisyadeeda u qaabilsan arrimhaas, marka ay suuro galnaqoto.”

Ugu damabaytiina Dr. Maxamed Cabdillaahi waxa uu ka hadlay shirkada Saracen ee wada qorshaha lagu tababarayo ciidammada Puntland ee hubkanina u socday.
“Arrinta shirkadaha qawaaniinta baalmarsan sida tan Saracen oo leh masuuliyada dayaaradan Saanadu saarnayd sida laga war qabana u socotay Maaulka Gobolka Puntland waxa imikaba ku bilaabmay dacwado ka dhan ah shirkadaas, taasna waxa keentay dadaalkii Xukuumada Somaliland, waxana aanu rajaynayaa in ay taasi yarayn doonto hawgalada Shirkada Saracen ay ka wado mandaqadan, waxa ay arintaasi ku dhamaantay guul weyn oo u soo hoyatay Shacbiga Somaliland,” ayuu hadalkiisa ku soo gebogabeeyey Wasiirka Arrimaha Dibada Somaliland.
<>E-mail
PDF
Print

Friday, December 31, 2010

Maxamed ‘Ictiraaf’ Oo Dhulmarkiisii u Horeyey ka Bilabay Wadanka Germany iyo Soo Dhawayntii U Balaadhnayd Ee Uu Kala Kulmay‏

Germany(BCT) 1/1/2011 Maxamed ictiraaf oo socdaal ku maraya waqooyiga yurub Ayaa  Haatan ku sugan dalka Germany isaga oo  caawa ka soo Degay Goranka Calamiga ee  Berlin, Halkaas oo ku soo dhaweyeen  Jaaliyadda Somaliland ee  wadanka germany taas oo ahayd soo dhawyntii u balaadhneyd Ee u kula kulmo wadanka germany , halkaas oo ku sugnayeen aqoon yahano reer somaliland iyo wax garad kale oo fara badan ,
 

Mar aan khadka Ku waraysanay Maxamed Ictiraaf ayaa waxa uu noo sheegay inuu ku faraxsan yahay safarka u ku marayo wadamada waqooyiga yurub isaga oo  ka bilaabaya safarkiisii dhulka ee u ku tagayo wadanka Maraykanka iyo Canada oo uu ku mari doono Gaadhi   isaga oo ku soo jeeda wadankiisii hooyo ee somaliland indhaha caalamkana ku soo jeedin dono sidii loogu heli lahaa Aqoonsi  .Waxana  uu  Dhawaan ka bilaabi doono wadanka Germanay kaas oo uu taagero buuxda ka helay aqoon yahanadii u ku soo maray wadamada   Norway Finland iyo Germany  .Uk ,

Maxamed ictiraaf oo sanadkan cusub  u Rajaynayo in la aqoonsado somaliland ayaa shegay in uu Baaq u Diray Madaxwaynha iyo Xukumada Somaliland iyo Saxafada Madax Banan iyo Kuwa Dawlada in Ay si Toosa u Gudbiyaan Safar Kan Dheer ee ku kala bixinayo Qaradaha Aduunka si Loo Helo Aqoonsiga Soomaliland ,lana war galiyo dhamaan safaradaha iyo Gudoomiyayahsha Somaliland si uu Socodkan Dheeri Noqdo Mid Mira Dhala. waxa kale oo uu Mahad Naq u  Diray Dhamaan Cidii ka Qayb Qatay Hawshan Iyo Dhamaan Umada Soomaliland iyo Xukumada Somaliland.

Maxamed Ictiraaf Ayaa Gabagabadii waxa uu Hanbalyo u diray Sanadkan Cusub Dhamaan Shacabka Somaliland oo Dhan Dal Iyo Dibadba Inta Ku Sugan.